ហុងកុង៖ ​ការបោះឆ្នោត​លើកទី១ក្នុងប្រវត្តិសាស្ត្រ អត្រាអ្នកទៅបោះឆ្នោតមាន​ប្រមាណ​តែ​២៧,៥៤%

ដោយ៖ ម៉ម ពិសី

អាជ្ញាធរហុងកុង បានព្យាយាមផ្សព្វផ្សាយ​ពាណិជ្ជកម្ម ដាក់ផ្ទាំងបដាពាសពេញទីក្រុង ដើម្បីជំរុញប្រជាជនឲ្យទៅបោះឆ្នោត ។ មិនត្រឹមប៉ុណ្ណោះទេ គណៈកម្មាធិការរៀបចំការបោះឆ្នោត បានសម្រេចពន្យាម៉ោងបិទការិយាល័យបោះឆ្នោត ដល់ទៅ​១ម៉ោងកន្លះបន្ថែមទៀត។

តែយ៉ាងណា យោងតាម​តួលេខ​ផ្សាយ​លើគេហទំព័ររដ្ឋបាលហុងកុង នៅព្រឹកថ្ងៃចន្ទ ក្នុងចំណោមប្រជាជនហុងកុង ៤លាន​៣សែននាក់ គឺមាន​តែ​ ១លាន២សែននាក់ទេ ដែលបានទៅចូលរួមបោះឆ្នោត​ ជ្រើសរើស​សមាជិកក្រុមប្រឹក្សា​សង្កាត់ កាលពីថ្ងៃអាទិត្យ ទី​១០ធ្នូ។ នេះគឺជាអត្រាអ្នកទៅចូលរួម​បោះឆ្នោត​ទាបបំផុត នៅក្នុងប្រវត្តិសាស្ត្រហុងកុង។