កងទ័ពអាមេរិកចោទអ៊ីរ៉ង់ ជាអ្នកវាយប្រហារនាវាដឹកទំនិញ នៅច្រកផ្លូវសមុទ្រអារ៉ាប៊ី

ដោយ៖ ម៉ម ពិសី
ថ្ងៃសៅរ៍ទី​២៣ធ្នូ ម៉ោង​១០ព្រឹក ​នាវាដឹកសារធាតុគីមីមួយគ្រឿង ឈ្មោះ MV Chem Pluto ដោតទង់ជាតិលីបេរីយ៉ា កម្មសិទិ្ធ​របស់​ក្រុមហ៊ុនជប៉ុនមួយ បានរងនូវការវាយ​ប្រហារដោយ​ដ្រូនអត្តឃាតមួយគ្រឿង នៅចំងាយ​ប៉ុន្មានប្រមាណ​ ៣៧០​គីឡូម៉ែត្រ ពីឆ្នេរសមុទ្រឥណ្ឌា ក្បែរកំពង់ផែVeraval រដ្ឋគូចារ៉ាត់។ ទីភ្នាក់ងារ​សន្តិសុខ​ផ្លូវសមុទ្រអង់គ្លេស UKMTO បានឲ្យដឹងថា ការវាយប្រហារនេះ បាន​បង្កឲ្យ​មានអគ្គីភ័យ​នៅលើនាវា តែត្រូវបាន​ពន្លត់ទាន់ពេលវេលា។​ កងទ័ពជើងទឹកឥណ្ឌា បានបញ្ជាក់​ឲ្យដឹងថា គេ​បានបញ្ជូនយន្តហោះ និង​​នាវាចម្បាំងមួយគ្រឿង ទៅអន្តរាគមន៍ជួយនាវារងគ្រោះ​។

ផ្អែកតាមកាសែត Wall Street Journal គឺនាវា MV Chem Pluto ត្រូវបានប្រើប្រាស់ដោយ​​ក្រុមហ៊ុន​ហូឡង់មួយ​។ ហើយ​​ក្រុម​ហ៊ុន​​នេះ គឺ​មាន​ជាប់​ពាក់ព័ន្ធ ជាមួយ​​អ្នក​ជំនួញ​ជនជាតិ​​អ៊ីស្រាអែល​​ម្នាក់ ឈ្មោះ Idan Ofer។ ប្រភព​ពី​កងទ័ពអាមេរិក បានអះអាងថា ដ្រូនអត្តឃាតត្រូវបានបញ្ជាចេញពី​ អ៊ីរ៉ង់​។